دؤردونجو تورونتو تورک فئستیوالی

دونن و بیر گون اؤنجه سی آگوست آیی نین ۱ و ۲-سی تورونتودا تورک فئستیوالی کئچیریلدی. قاباقکی ایللره گؤره داها دولو و گؤزل ساییلان بو فئستوالا تورکیه ایله بیرلیکده باشقا تورک خالقلاری دا قاتیلمیشدیلار. تورک خالق موسیقیسی، ال صنعت لری، خالق رقصلری و زنگین تورک مطبخی فئستیوالا گلن قوناقلارا سونولدو.
تورکیه دن تورونتویا قوناق اولان مهترلر، قدیم عثمانلی اوردوسونون مارشلاری ایله هر کسی اوزاقلارداکی تورکیه نین کئچمیش تاریخینه آپاردیلار.
بو ایل یئنه ده دؤردونجو ایل اولاراق گونئی آذربایجانی آراز رقص و موسیقی گروهو تمثیل ائتدی. آراز گروهونون رقص بؤلمه سینده صمد پورموسوی، علی قائم مقامی، فرهاد جاوید، رضا راد، ثمین افتخارنژاد، نوشین داور، علی ثانی، ویدا حضرتی و لاله جوانشیر قفقاز و آذربایجاندان رقصلرله صحنه یه چیخدیلار. موسیقی و خالق ماهنیلاری بؤلومونده ایسه سازدا صمد پورموسوی، مهدی سقطچی، علی ثانی، قارماندا خان گلدی اوونوق، گیتاردا علی ثانی، ناغارادا صمد پورموسوی خالق ماهنی لاریندا احمد ابرا و لاله جوانشیر آذربایجان موسیقیسی نین اینجه لیکلرینی پروقراما گلنلره سوندولار.

کانادا دا دوغولوب بؤیوسه لر ده ګؤزل تورکجه دانیشان بالاجا اوشاقلاریمیز دا «قوشلار و جوجه لر ماهنیسی» ایله قوناقلاری شن لندیردیلر. سونای تیار، شن آی حاملی، آی ګون زرین و آیدین زرین سس سسه وئریب آلپای تیارین کیچیک اللرینه آلیدیغی آشیق سازی ایله بیرلیکده ماهنیلارینی اوخودولار. اوزاق ائللرده ائولادلارینا تورکجه میزی بو قدر دوزګون و ګؤزل اؤیرتمه یی اونوتمایان آنالاری آتالاری وار اولسونلار.

آذربایجانلا بیرلیکده تاتار موسیقی اؤرنکلرینی قازان تاتارلاریندان ریما خانیم تقدیم ائتدی. دوغو تورکستان ایسه گؤزل تورکوستان رقصلری ایله صحنه ده ایدی.
۲۰۰۹ تورک فئستیوالیندا ایلک کز اولاراق آراز ګروهو آذربایجان غرفه سی ده دوزنله میشدی. غرفه ده رضا رادین سرامیک و ساخسی ایشلری، روحی تونانین هئیکل لری و نیلګون شن ین شمع ایلری سرګی لنمیشدی. ائله جه ده تورونتودا یاییملانان «حیدر بابا» قزئته سی بو غرفه دن داغیتیلماقدا ایدی.

> .

.