ږ
باخيشيندا سؤزلر وار،
باخيشيندا گؤزلر وار.
آينانی دورو ساخلا!...

ږ

. ږ
اوتانجاق،
صداسيز،
ساری گول کيمی؛
باهارا يوخ دئيه گولومسه ديگين،
هر فصیل تزه دير!
زحمت سيز ميضراب سيز اورک تئلينی
اوخشاييب اوينادان بو نغمه ندير؟

.
هميشه باهار
ږ
هميشه باهارسان لاکين اوزاقدا
سن سيز کؤنول قوشو يووا باغلاسين
هانسی بوداقدا؟

/
بنؤوشه

نئچه گول وار سئويرم
ان اول باشداسينی
باهارين موژده چيسی
اينجه جيک بنؤوشه نی.

/
دولون آی

اون دؤرد ياشيندا ايکن
اون دؤرد گئجه ليک آيا بنزتديم اونو،
قوی دئسينلر ائل ایچينده
کؤهنه بئيين ايميش!...

/
اوخشاتما

قاتی اوخچولارين
قاتی يايلاريندان باشقا بير زادا
اوخشادا بيلمه ديم قارا قاشلارينی،
توفنگ قارووولدان دوشن آخشام چاغی
قاش قارالان زامان.

/
سن گولسن

سن گولسن شهرين تيکان ليغيندا،
سن گولسن
شعريمله بولبولون اولاجاغام من.
محبت باغينا دولاجاغام من،
سن گولسن.

...............................

.
ديليميز
ديله ييميز
امه ييميز

وطن عشقيله آليشان
آزادليق اوچون چاليشان بير قوچاغين قلمی ايله
معاريفين درگاهينا جانلی بير سؤز يازيل ميشدی،
سانکی بو سؤز بير آرزو تک
اورکلرين لؤوحه سينده قازيل ميشدی:
آذربايجاندا درسلر
آنا ديلده اولسون گرک!

بيزيم زونوز آلماسينا
بنزر ناری ساتان اوغلان،
داشقاسی نين اوزرينده
ائيله ميشدی تورکچه اعلان:
" ساوا ناری آلتی تومن! "

کيم اؤيره ديب اونا گؤرن؟
دئيه - دئيه اؤزومه من
ائلچين گيلين کوچه سينده
بير تاکسی نين شوشه سينده:
آتا ياواش
آنا ياواش
اؤرت قاپينی!
گؤردوم داها
اود توتورام گئده - گئده
آرزولارا باخا - باخا
سوروشورام اؤز اؤزومدن:
نه اوچوندور آذرلی نين
الی باغلی، ديلی باغلی اولسون گرک؟
اؤز ديلينه گرچک عشقی
ياد تؤره دن تيکان ليقدا
بير گول کيمی سولسون گرک؟

قونوشارام اؤز - اؤزومله:
بير ميللتين ديلين آلسان
ائله بيل کی يولون آلدين.
وارين آلدين، يوخون آلدين!

دوشونورم اؤز سؤزومله:
خالقيميزين ديلين دانان
ديله یين ده دانا بيلر،
امگين ده دانا بيلر!...
ږ