سن یوخسان
سنسیز لحظه لر «کیشی مجلیسی»
سنسیز قادینلار «شبستان» یوکو
سنسیز، یاشاسین انتحار
سنــــنن ائروتیک ساعاتلار یئریمیر ایندی
سن – سیز … - بویورون یوخاری باشدان اَیله شین خاتین
من – سیز، نه خوش رنگی وار لیفچیی نیزین
اللریز پامبیقلیق کیمی دیر
ساچلاریز ساری سونبوللوک

شَهَرلی شاعیرین بَنزَتمه سییــنن
-«مرسدس ترافیکی!
اودکُلن سرخوشلوغو…»
نییه دوداقلاریز قایسی قاسناغی دیر؟
ماتیک کی باهالاشماییب!..
یا کی سورولماسین دئییرسن
سورمارام، یانی سوروشمارام دَه ه ه ه…

..
********************

..
سن یوخسان
جنایت ایشینده سورغولانیرام
سن منی اؤلدورندن
دوستاغا سالیندیـــن قبرینده!
سنـــسیز ایستیکانیمین یاریسینا مئه دولوب
یاریسینا سنـسیزلیک ایچگی
آدین بئله مئیخوش اولور هردن
آدین ... زیندان .... دا
«آزادلیق گؤیلومه دوشور»
کئفلی دئییلم هااااااا…
«نه یاخشی سن وارسان آی صدفلی ساز»
[...من عاشیق گونده دارا
...گئجه یاغان قار کیمی
...قورخورام گلمییه سن
...کیپریکلرین ایسلانیر]

.
***
.

سن یوخسان
وزن قافیه بوش شئیدیر
جمله قورولوشوم «قورولوشمور»!!!
قاریشیرام جمله ده س ن م ـه
فارسجا دوشونوب «تـــرک» یازیلیرام
«او»لاریم سنده قالیر
خوشدور او دَبَرمه
تورکجه یازیرام، فارسجا دوشونولمورم
سنی، می سئویرم، تو ر … ا
فارسجا خیلی ماهی، یانی آیداسان
هارا تؤکوم باغیشلا بونو [آیدا]
دستمال یوخوزدو؟
بوش سطیل نئجه؟
بوندان شعر اولمایاجاق، سندن سئوگیلی
جیریرام بونو، جیریرام…
هارا تؤکوم بونو
سطیلیز یوخدو؟
اوستوزو بولار !…
دورون آیغا جهنّم اولون
بولاندی بو شعر…
دستمالیز یوخدو، اوستونه شعر یازام!
اَن گؤزل شعریم سن سن
من سیز سیز ده، سیزسیزلئییرم
من، سن- سیزه، سن سیز دئییرم
من، سنــ یزه، بیز … سیز دئییرم
سیز تبریز سیز سیز ، یوخ ، سیز نرگیز سیز !
سیز… اَششششــــــی بوراخین…
گؤر نئجه حال وئردی کودتا
عشقیم – ی هارا تؤکوم دیکتا «تورم» و – مو
آغزینیزی آچی…ن لوطفن
گؤزلدی قونچه دوداقلاریز
قانلی – دی اللریز!!!
اللرین-اللرین نه سویوقدو دیکتاتورجیغیم
آخ خ خ خ ………….
قورتاردی مخملی انقلاب
قانلا قورتاردی…
- دستمالیز یوخدو؟ [شـئـی]
آغلاماق ایسته ییرم…