1
اؤنجه قيرميزيني گؤردوم،سوسدوم،نه اولدوغوندان دانيشديم،
يئنه قيرميزيني گؤردوم،سوسدوم،يئنه نه اولدوغونو دانيشديم،
دوداق لارينمي؟اللرينمي؟نه لرين؟
جام لاردا تيتره ديسه ياغمور دنه سي،پيانومون قانلي كلاويه سي،سوسماديم و توخوندوم...
ديشاردا يارپاق لار قوندو آغاج لارا،يارپاق لارا بولودلار،
ايچينه قوش لار گيردي،هر نه تيتره دي قورخدوم...
بيريسي رسميني چكدي فورخونون ودوندوم
قيرميزي لارلا بير يئرده اوتوردوم،مظفريه ده سونونجو تينده
آسيلديق ديوارلارا
تابلونون آدي"نفس"
.
2

بير-بيرينه دَيينجه رنگلر،شهر اولور،يا جغرافيا ائشييينده بير قصبه...
يئنه بولودلار اولور، بولودلاردا قوش لار و يئنه يارپاق لار،
آغاج لار آلتيندا ايتلر...
توخونموشدومسا دوداق لاريندان اوتانديم،سوسدون و اوفله دين،اولدو دئپرم لر...
گؤي اوزونده آغي لار،گؤي آلتيندا ديوارلار،ديوارلار آلتيندا اؤلوم
رنگلر كودتا اولدو قزئت لره،دوداق لاريندا بير خبر،ساكيتجه گولر:
"-دونَنكي دئپرمده هرنه،بئله دئپرم ده اؤلدو
بير اؤلوم قالدي بيرده ديواردا تابلو"
فلاكتين كُد آدي"نفس"
.
3

اؤنجه قيرميزيني گؤردون،سوسدون،نه اولدوغوندان دانيشدين،
دوداقلارين دوداقلاريمدا اؤلونجه
بير قاتار كئچر آغزيندان آغزيما،
جغرافيا ائشييينده،قيراق يول لاردا بير ايستاسيوندا
بيريسي توپلادي،هرنه ييني بيريسي،فصيل لردن پاييزدي،ساعات لاردان اوباشي بيريسي...
چانتاسيندا يازماق اوچون شئي لر،بيراز ايچگي،بيراز سيگارت،بيراز خاطيره...
نه وارسا آرخادا دؤنه جك دئيه صيفيره
بيريسي آيريلدي،بير فاتار كئچدي،بيريسي بير سحر كئچدي...
قاتارين آدي قيرميزي،گئده جه يي مقصد"نفس"