شئی کسن بکتاش آغا
عزيز نسين
آذربایجان تورکجه سینه کؤچورن: رسول ممقانلی
.

خئيیر٬ شئی کسن سوی آديميز دئیيل. بيزه شئی کسن بکتاش آغا دئيیلمه سی باشقا اوزدن دی... دوغرودور، شئی کسن بکتاش آغا آدیلا تانین میشیق، گئرچک سوی آديميز اونودولموش دور. گوناه مي ائله میشیک؟ الله عؤمور وئريرسه، داها ايکی ايليم قالیر. هر بير ايشين باشی ساغليق، گئريسی يالان... عؤمرو اولان اوچون ايکی ايل چوخ ساييلماز، بلی...اوغوللاريميز، نوه لريميز وار چوخ شوکور. باخارلار بيزه، هئچ بير سيخينتي ميز يوخدور. ملاقات يميزا گليرلر. وار وار، هر بير شئيميز وار...
بيزيمکی بير ادعا اوزرينه اولدو... بيز ادعانی قازان ديغيميز اوچون، سونوندا محبسه دوشدوک. شرفيميزله دوشدوک. بلی بئله دير. زينداندا دا خاطیريميزی ساخلارلار، گؤلگه لری باشیمیزدان اسکیک اولماسین... سيزدن یاخشی اولماسينلار، دوستلاريميز چوخ ياخشی ديرلار، چوخ يارديملارينی گؤردوک...
يوخ، تصادف دئیيل بيز بيله – بیله گؤردوک بو ايشی بَی. هئچ ده پئشمان دئيیلم. تاريخه کئچن بير درس اولسون دئیه ائله دیک٬ کئچدی ده تاريخلره... بلی٬ دوز بويوردوز. آنلاتساق یاخشی دی، باشيزی آغريتماساق...
بيزيم اورالاری بيلير سیزمی؟ دئمک هئچ يولوز دوشمه دی. سيزین کيمی بَی لره گئديله جک، ياشانيلاجاق يئرلر دئیيل. اولا کی اينسان حؤکومَت زورویلا گؤندريله، يادا مامور اولاراق جئبلرينی دولدورماق اوچون بير ايکی ايلین قهَری چکيله. بيزه باخما بَي، اورا بيزيم يوردوموزدور، بيز عادت ائله میشيک. آمما سيزه چوخ چتين اولار. مگر گؤيدن قیزیل ياغا کی دوام گتيره بيله سيز.
بيزيم اورانين اينسانلاری قاچاقچي ليقدان کئچينير. قاچاقچي ليق اولماسا، يئدی دن يئميشه هامیمیز آج قالاریق. قوربان اولدوغوم يارادان، هر قولونون روزي سينی بير آيری يولدان وئرميش. نه بويورموش؟ « من بير چولاق قاریشقانی بئله آج بوراخمارام » بويورموش. مئشه ليک بير يئرده ده یاشامیریق کي، قاچاق آغاج کسيب اودون ساتاق. اربابلاری زنگين کندلريميز يوخدور کی عصيانچیسی اولا، يول اوستونده يئرلشمه ميشيک کي، يول کسک. بونلارين هئچ بيريسی اولمايينجا خالق هاردان چؤره یين تاپاجاق؟ آج کی قالماق اولماز! البت کی بير کئچينه جک يولو تاپيلاجاق. بيزلر چاره سیزلیکدن قاچاقچی اولموشوق. دئمک٬ کور قوشون روزی سين يوواسيندا يئتيرن تانری، بيزی ده سرحدده ياخين بير قصبه ده دونيايا گتيرميش کي، عاغليميزی ايشله دیب قارنيميزی دويوراق.
بو قاچاق چيليق ايشلری نئجه دير بيليرمی سيز؟ هاردان بيله جک سيز...بيلمه سينی بيلمزسيز، دئمیره م بیر بيلن یندن ائشيت ميش اولاسیز. بو قاچاق چيليق ايشينده آرخانی بير حکومت آدامينا داياياجاقسان، يوخسا قاچاق چيليق اولماز.
او جيم جيريک اوغلان گلمه میشدن قاباق بيزيم ایشلر ياخشی ایدی. او گلديکدن سونرا بيزيم اورانين ايشلری پوزولدو. يانديق کی نه يانديق.
بير گون آداملاريمدان بيري:
آمان بکداش آغا، بو جيم جيريکی يولا گتيرمه یين بير يولو يوخ مو...؟
هله يئنی دير؛ بير آز دؤزون، دئديم. قوی هله يول تری سويوسون. اوستونه گئدیب اونو تحريک ائتمه يين...

بو حؤکومت آداملاري نين خويو باشقا اولور. « آروادین کؤهنه سی٬ مامورون يئني سی ايشه ياراماز» . ايکيسی ده کؤهنه لديکجه ده یه رله نر. نه دئیيرسن بَی يم٬ حؤکومَت آدامی يئنی ايکن قيلينج کيمی کسکين دير، زامان کئچديکجه اونا چالار بونا چارپار کوته لیب، آليشار.
کئچميش لرده بيزيم اورالارا بئله بيريسی بيردفعه ده گلميشدی٬ سرحددن قوش اوچا بيلمزدی. او زاماندا منه گليب دئديلر، بونا بير چاره تاپ يوخسا بئله گئدرسه بيز آجيميزدان اؤله جه ییک... اونلارا دئديم بير آز دؤزون، بير موددت سونرا او موم کيمی يوموشالار. دئديیيم کيمی ده اولدو. بير گون او منی یانینا چاغيردی.
امريز اولسون بَی دئديم.
استغفرالله!.. نه امری جانيم!.. سيزين بورالارين حؤرمتلی اينسانی اولدوغوزو دويدوم، گؤروشوب، تانيش اولاق دادلی-دادلی سؤيله شک دئديم...
هله ، هله.. بللی ایدی کی صبری توکنميش دی. چيخارت آغزينداکی پاخلانی اوغلوم. دانيشدی - دانيشدی سونوندانا اوریينده کی سؤزو آغزينا گتيردی: بورا گليرکن٬ سيزين بورالاردا خانیملار اوچون نايلون قاتلی آلت پالتارين اولدوغونو ائشيتديم. بو گونه جن من بئله بير شئی گؤرمديم. بيزيم عيال نايلون نايلون دئيب ال چکمير. خانیم طایفاسینا سؤز آنلاتماق چتين دیر ... دئدی.
اوزون سؤزون قيسساسی٬ همن آل-وئره باشلاديق. بيز بونلاری اووجوموزون ايچی کيمی تانيريق بَي.


آمما بو يئنی گلن جيم جيريک يولا گلميردی. نه ائتديک نه ائله ديک اولمادی کی اولمادی. نییه دئيه جک سن؟ چونکو بو جيم جيريک دیندار بیر آدام ایدی. ايچکی ايله يولا گلمه دی. بير دامجی راکی٬ شراب آغزينا وورمازدی. دئديک بلکه قومار اويناماقلا بير آچار سالساق٬ اودا اولمادی. اويون کارتينا الين بئله سورتمه زدی. آروادبازليغی دا يوخویدو. حاراما ال وورمازيميش... اليمزدن گلنی ائله دیک٬ آما نه فايدا. آدام چوخ ديندار بيريدی ایدی...
او زامانا قدر من جيم جيريکين اوزونو گؤرمه ميشديم. ياخيندان گؤروب اوز به اوز دانيشماق ايسته ديم. آما اونو گؤرمک مومکون اولموردو. نه شؤلنه نه ده تويا گليردی. آيلاردان رمضان ايدی. بيز اونو ایفطارا چاغيرديق. من جيم جيريکی ايلک دؤنه اوندا گؤردوم. بوشونا جيم جيريک دئمه ميشلر٬ بوی-بوس يوخ٬ قارا-قورا٬ قره چی ماشاسی کيمی بير گئده. داغدا باييردا گؤرسن٬ بو هانسی يابانی* حيوان دئیب چاشارسان. يارادانا قوربان اولوم٬ ائله بير شئی ياراتميش کی اورماندا قورد گؤرسه باغری چاتلار. الله - الله... قاباقجادان اينسان دئيیب تانیت ماسايديلار٬ من اونو آداما بنزه ده بيلمه يه جکديم. بير چوروک پاخلا بویدا حريفين بير سسی وار کی٬ زورنا سسی اونون يانيندا فيسيلتی قالار. ای قوربان اولدوغوم تانريم٬ او سسی٬ بو جولو بارماغيم بويدا حريفين هاراسيندان چيخاردیرسان!...
من حريفی گؤروجک اونون نییه باختی باغلی اولدوغونو آنلاديم. آخی٬ بونا هئچ بير آرواد قورخوسوندان ياخينلاشماز کی٬ باختی دا آچيلسين.
دانيشماغا باشلاديق٬ اونو ساغدان سولدان يوخلاديم. خئيير٬ سالاجاق بير آچار دَليگی تاپانماديم.
دئيیردی کی: بيزيم قانونلار قانون مو؟
ـ نییه؟
ـ من بونلارا قانون دئمه رم. ائله بير قانون اولاجاق کی هئچ بير پيس ايش گؤرولمه يه جک و هئچ بير سوچ** ايشلن میيه جک. بلی٬ بيزه شريعت قانونلاری گرگ. شریعتدن اوز دؤنده رندن بو ميللت ده اخلاق قالمادی...




ائله اوجا سسله «شريعت قانونو» باغيريردی کی زلزله اولوب دامين باشيمزا ييخيلماسيندان قورخدوم. بيزيم اورالارين ائولرينين داملاری تورپاقدان دير. يوخاريدان طياره دن باخيلسا قصبه گؤرونمز.
من جيم جيريکه دئدیم:
- قارداش منی باغيشلا٬ سنين بو شريعت دئديگين قانون ندير؟
- نئجه ندير! شريعت قانونوندا بيری اوغورلوق ائتسه الی کسيله ر.
- وای آمان...
- آمانی٬ زامانی يوخ. روشوه آلانين الينی کسه جک سن.
ياهو٬ باخ٬ بو بلا ایله جاماعاتی قول قيچدان ائديب٬ آجيندان اؤلدوره جکسن.
یئنه سوروشدوم: ياخشی٬ سن دئين اولسون. آمما اوغورلوغون آزی وار چوخو وار... رشوه نين آزی وار چوخو وار... شريعته گؤره نه قدری کسيله جک؟
دئيه ر کی: جناب الله هر شئيی اندازه سينجه ياراتميش دیر. مثلا قول ندن اوزوندور؟ البته کی بير سببی وار.
- آمان٬ يعنی اوغورلوق ائله ديکجه بيرآزی کسيلسين می يوخسا؟
- بلی٬ ياخشی باشا دوشدون. قاچاق جيليغين قاباغی آلينماز دئيیرلر. قوی شريعت قانونی گلسين٬ بونلارين آياقلارينی کسسين٬ باخ گؤر نئجه قاباغی آلينير.
- نه قدری کسيله جک؟
- ائله ديگی قاچاق چيليغی قدر. آز اولسا آز٬ چوخ اولسا ديب يندن...
اؤز- اؤزومه دئديم٬ اوغلان بئله گئتسه بو جيم جيريک میللتين الين- قولون کسدیريب هاميسينی ديلنچی ائده جک.
بيزيم کل حميدی چاغيرديم.
- اوغلوم حميد دئديم: بو شريعت ايشيندن يالنيز سن جان قورتارا بيليرسن. اونون قيچی تاخدا دان اولدوغو اوچون٬ قاچاق چيليقدا توتولوب آياغی کسيلسه گئدر اؤزونه يئنی بير تاختاآياق دوزه لتديره ر!
جيم جيريک:
- شريعت قانونو بئله دير. قونشونون ماليندا گؤزو اولانين٬ نامحرمه باخانين٬ گؤزونو چيخارداجاقسان. الله هر شئيی قاباقجادان دوشونوب. ندن اينسالارا بير گؤز يئرينه ايکی گؤز يارادیب؟
- يعنی بيری زاپاس می؟ بيرينی چيخارتسان او بيری قالسين دئیه می؟
- یاخشی بيلدين٬ یئنه عاغيل لانماسا او بیریسی نی ده... شريعت قانونو گلسين٬ گؤر هئچ پيس ليک قالير؟ يالان دانیشانین٬ يالان يئره آند ايچنين٬ يالاندان شهادت وئرنين...
- ديلينی قوپارداجاقسان يوخسا؟
- ياخشی آنلادين. بس نییه الله تعالی اينسانين ديلينی بو قدر اوزون ياراتميش؟
- هر يالان دانيشاندا بير آزی کسيله جک٬ دئمک؟
- هه٬ ياخشی آنلایبسان...
بو کؤپؤی اوغلو جيم جيريک اينسانلاری میداد قاتلایان کيمی کسيب آتاجاقميش.
من سوروشدوم: بو سيزين شريعته گؤره زنا ائدنلر٬ خالقين ناموسونا ال اوزادانلارا نه اولاجاق؟
دئدی: کسيله جک.
- شئيی می؟
- بلی٬ شئيی کسيله جک. الله تعالی ندن ... سؤزونو کسدی.
- هر دفعه زنا ائتديکجه بير آز اوجوندان کسيلسين دئيه می يوخسا؟
هه٬ ياخشی آنلایبسان...
- ای واه.
بو جيم جيريک ياندی دئديم اؤز - اؤزومه. گئده جينقيلی بارماق قدر آدامدی. اوغلان، شئين ديبی سو دا دئيل کی٬ هئی باشدان کسه سن٬ ديبدن گؤيره. بيزی خواجه ائديب وطنی اوشاقسيز قوياجاقسان می قورومساق؟...

- چوخ گؤزل دئدين٬ بوشريعت قانونوندا زنا ائدن آروادا نه دوشونولوب؟ آروادين نه يی کسيله جک؟
- داشلاناجاق..
بئله بير غيرتلی شريعتچی آدام يولا گلر می؟ من دوشونمه يه باشلاديم. بو حريف يا اونا وئريلن روشوه لری آز گؤرور، يادا دوغورداندا شريعتچی دیر کی٬ او زامان يولا گلن دئيیل.
من اونو سيناماق اوچون سوروشدوم:
- ايراق٬ ايراق٬ من اؤزوم بيرينين ناموسونا ال آتسام شريعت منه نئينر؟ کسر می؟
البته کی. اؤز بابام اولسا بئله یئنه کسه رم.
- مقداری نه قدر اولاجاق؟ دول آرواد اولسا نئجه٬ باکره قيز اولسا و يا ائولی قادين اولسا نه اولاجاق؟
بلديه نرخی کيمی ائله بير تعريفه وئردی کی٬ ائولی قادينلا اولسا زنا٬ کؤکوندن کسيله جک دئدی...
من بوگوندن سونرا اوزون - اوزون دوشوندوم. جيم جيريکی بير امتحان ائتمه لييديم. اگر او٬ دوغروداندا دئديیی شريعته اينانيرسا٬ منده قاچاق چيليقدان ال چکه جه يم. بيزيم اورالاردا باشقا چؤرک قازانما يولو اولماديغينا گؤره ده آيری بير يئره کؤچه جه يم. يوخسا بو جيم جيريک دئدييی کيمی شريعتچی چيخماسا٬ دئمک او زامان ياندی او. اوندا من اونا شريعت قانونونون عينی دئدييينی ائله یه جه یم. اؤزومه سؤز وئريب٬ آند ايچديم.
بيزيم اوردا نازلی آديندا بير جوان آرواد واريدی کی اؤلونو ديریلدیر٬ جانسيزا جان وئريردی. اؤز ايشينين اوستاسی ایدي. الينين اوستونه ووران کيمسه يوخدو... نازلينی چاغريتديم:
- قيزيم نازلی... سنه بير ايشيم دوشوب٬ اگر باشارا بيلسن٬ مندن نه ايسترسن ایسته، گؤزوم اوسته وئره رم...
- آمان بکداش عمی٬ ساينده گؤره بيلمه دییم ايشمی وار! امرين اولسون...
- مسئله نی نازلی قيزا تر تميز آنلاديب٬ سونوندا دا دئديم :
- بو ايش اولسا سنين ائوينده اولاجاق کی٬ بيزده بير گؤزل سئير ائده بيلک. سن بير جور بو جيم جيرکی ائويوه چک٬ دئديم.
- هونريمزی بيزه اؤیره تمه بکداش آغا٬ دئدی٬ سن بويوردون، دا قالانينان ايشين اولماسين. بيزيم بيله یيميزده آلتون بيلزيکلر اوينایان آروادیق...
من آند ايچميشديم بَی٬ نازلی قيز او گئده نی يولدان چيخارتاماسا٬ منده يوردومو ترک ائديب باشقا بير ویلايته يئرلشه جکديم. اگر يولدان چيخاردا بيلسه٬ او شريعتچی قورومساغين شئيینی ديبيندن کسيب تاريخی بير درس وئره جکدیم...
نازلی قيز جيم جيريکين اداره سينی تميزله مه يه باشلادی. بيزده اسگی تاختا باغدادی اوستونده کی تؤکولموش سوواق آراليقلاريندان ايچريه باخيرديق.
نازلی بالا٬ شالوارينی بودلارينين اوستونه جن چيرمالاميش٬ يالين آياقلاريلا دؤشه مه تاختالاری سيليردی. آما نئجه بير تاختا سیلمک جانيم... ايکی آياغينين آلتيندا قالان ایسلاق بئزين*** اوستونده قيرجانا - قيرجانا فیرلاندیقجا تاختالار جير - جير سس وئريردی. جيم جيريک ايچری گيريب نازلی نی او حالدا گؤرونجه٬
- تميزليک من گلمدن قاباخ قورتولمالی دیر! دئدی.
گئج قالديم بيرآز٬ ايندی بيتر! دئدی نازلی. سولو بئزين اوستونده هلله نه - هلله نه فیرلانماغا باشلادی. شهرده کی اوغلانلا ر و قيزلارين رقص لری اونون قير تؤکمه سينين يانيندا هئچ نه دیر. هله بيرده چالقيچی اولسا٬ نازلی قيزين اويناماسين گل او زامان گؤر. جيم جيريک آياقدا دونوب قالميش٬ قيزين بودلارينا باخاراق آغزينين سويو آخير. نازلی قيزدا٬ قورومساق شريعتچی اونولاپ یاخشی گؤرسون دئيه دالينی اونا چئويرميش٬ اونباسينی بير ساغا بير سولا آتير. نه بود آتما بَييم٬ بير قاريش ساغا بير قارش سولا آتيردی. شئيطان دئيیردی کی: اوغلان بکداش کئچ... دايانماق اولموردو جانيم.... نازلی قيز اونباسينی آتا - آتا دالی - دالی گئديب جيم جيريکين قاباغينا گلدی٬ سانکی اونو گؤرمور. جيم جيريکه بير بود آتيب اونو دووارا چيرپدی. جيم جيريکين بدنينه تيترمه گليب جانينی تر باستی. سيلکه له نيب اؤزونه گلديکدن سونرا٬
- سنين آدين نه دیر٬ دئدی.
- نازلی
- نازلی٬ يئری نه گؤزل سيليرسن... گل منيم ائوين تاختالارينی دا سيل!...

- خالق سؤز چيخاردار٬ گئدر اريمين قولاغينا چاتار. گله بيلمه رم.
- ارين هاردا؟
- وطن اوچون خيدمتی وظيفه ده.
- نازلی بالا نه گؤزل دانيشيرسان٬ آفرين سنه. ماشالله٬ ائله بیل بولبول دور.
- اريم سرباز اولماسايدی٬ منيم ائلين ائوينده کولفت کيمی ايشله مه ییمه نه گرک واريدی؟ قازانديغيم پولونان هم اؤز قارنيمی دويورورام همده اريمه خرجليک يوللورام.
- ارين عسگر دئمک...
جيم جيريک چوخ اومودلانميشدی.
- هه يه وطنی وظيفه سينی یئرینه یئتیریر. ايشيم قورتولدو. من گئديرم...
- دور هله. ايش بيتمه ميش... بورالاری ياخشی تميز...
بئش گون سونرا نازلی قيز منيم يانيما گلدی٬
- بو گئجه ائويمه گله جک٬ دئدی. آمان بکداش آغا٬ مني او گئده ايله بيرليکده اوزون موددت بير اتاقدا قويما، سن الله. حريفی گؤرونجه اوره یيم بولانير٬ آز قاليرام قوسام. بلکه اليمی قولومو توتدو...
بيز اوچ کيشی نازلی قيزين ائوينه گئتديک. بير اتاقدا گيزلنديک. نازلی شريعت قورومساغينی يان اتاغا چکمه لی و بيزده اولانلاری گؤره بيلمه لی ديک. جيم جيريک ائله اؤزون ايتيرميشدی کی گوندوز گؤزو اورا گلمک ايسته ميشدی. آما نازلی اوشاقلاری ياتيرتماسام اولماز دئيب اونون آخشام گلمه سينی ايسته ميشدی.
بلی٬ جيم جيريک گليب اتاغا گيردی. باشماقلارنی الينده توتوب آياق دره – دره يئريین گئده بير جینه اوخشاییردی. نازلی باشماقلاری اونون اليندن آلماق ايسته دی٬ اما او قوندارالارينی قارنينا باسيب دئدی: «نه اولار نه اولماز ايگيدين پاپوشو يانيندا گرک.» اوتانماز - اوتانماز نازليدان سوروشدو: « اوجاغا سو قویدون؟ »
باخ٬ باخ من اؤلوم بو دينی تکميل شريعتچی موسلمانا! اری وطن سربازی اولان ائولی بير قادينلا ياتاجاق٬ اوندان سونرا دا بير غسل ائدیب تر-تميز يوواجاق گوناهينی.
نازلی٬ سو اوجاقدا قيزيشماقدا دئدی.
- ائله ده سويون تئز اول...
- يوخ٬ من اوتانيرام...اؤنجه سن سويون٬گؤزونو ده يوم٬ من سنی دؤشه يه چاغيرارام...
جيم جيريک سويونماغا باشلادی. بَيیم٬ او جينقيلی آدامدا بير قيل وار نه قيل...جانی دا اه یری - بويرو قارا هؤرومجک کيمين بير شئی.
نازلی قيز گئده نی تونوکه لی گؤرمه مک اوچون ايشيغی سؤندوردو و بيزيم اولدوغوموز اتاغا قاچیب قاپينی اؤرتدو.
جيم جيريک:
- قحبه، هارداسان قيز؟
قاباقجادان اؤیره ت ديیيميز کيمي٬ قيز سسلندی: من سويونوب دؤشه يه گيرديم٬ سن ده گل بو اوتاغا. آما دالی - دالی گل کی منيم چیپلاق بدنيمی گؤرمه يه سن! من بو ايشلره عادت ائله مه ميشم٬ اوتانيرام... دالینی چئویر، دالی - دالی گل٬ يوخسا قاچارام...
نازلی اونا ايت کيمی هور دئسه٬ هوره جک. آنقير٬ دئسه آنقراجاق. قاپينی آچديق راحات ايچری گيردی. من اونون آرخاسينا کئچديم بئليندن قوللاريمی کئچيريب ائله محکم قاسناقلاديم کی آغزينی قوش ديمديگی کيمی آچيب يومورسادا سسی چيخمير. جان قايغيسی ايله٬
- قيز قحبه بو سنده کی گوج نه گوجودور٬ منی قورت قاپانينا می آلدين؟بوراخ٬ بوغاجاقسان٬ دئدی.
من اونو يئره ييخماملا٬ ايمانسيزين ايمان تاختاسينا چؤکوب٬ آرخاداشلارا٬
- ياخين ايشيغی دئديم.
چيراغ ياندی. آلتيمدا قارا بؤجک کيمی چابالايان جيم جيريک منی گؤرونجه اينله دی:
- آمان٬ آمان بکداش آغام!...
- آمان قالمادی اوغلان٬ شريعت قانونو ايسترسيز٬ يوخسا اخلاق گئدير الدن... ائولی آروادلا زنا ائدينجه نه قدری کسيله جکدی؟
- آمان٬ آمان بکداش آغام!...
- ائولی قادينين اری وطنه خدمت ده اولورسا؟
- آمان...
قادين اوشاق آناسی ايسه؟
- آمان...
- دييندن می؟ کؤکوندن می؟
پيچاغی سييیرديم.
- اؤلدور٬ اؤلدور منی ده٬ شئيمی کسمه. بوغازيمی کس٬ کلله می آل... اؤلدور منی بکداش آغام...
- اوغلان ناموس سوز... من سنی اؤلدورسم بو گئريجی کندليلر جمهوريت مامورونو شهید ائتديلر دئیه سنی قهرمان ائده رلر. سؤزدن قاچدی يوخدو٬ شريعت اجرا اولاجاق. بيز شريعت ايسته یيريک.
يولداشلار اللرينی آياقلارينی توتدولار٬ پيچاغی چالديم...جيم جيريک سئرچه بويدا بير آدام دی. قورخوسوندان گئده نين شئيی بوزولوب ايچری چکيلميش دی.
بلی بَييم٬ نه باشيزی آغريديم٬ بيز او جينقيلی شئدن اؤتورو بونجا ايل زينداندا قالديق... بو نا گؤره ده شئی کسن بکداش آغا آديله مشهور اولدوق.
.

.......................

.
* وحشی
** گوناه
*** پارچا - دسمال